隱匿的，被看見

（都什麼年代了，剝削、欺壓、既得利益者的不公義和欲蓋彌彰，跟上古時代似乎無大差別；facebook 轉貼來的，有了網絡世界，所有的隱匿辛酸，工人自己寫的字，不被看見的群組，找到發聲渠道——）

工會及工盟宣佈：下午 4 點開始發放罷工基金，每人$1,000。
派 $1,000 係因為，罷工基金依家有 40 幾萬，而罷工工人約 400 幾，希望一分一毫都盡快發放俾工人。
職工盟 (HKCTU) 「碼頭工人罷工基金」捐款戶口：
帳號：恆生銀行　 （024）-295-8067833
戶口名稱：香港職工會聯盟


早兩日從葵芳乘綠巴入碼頭
一工友坐我前面，聽到佢同朋友傾電話，內容如下
（今朝出門口，我老豆攞住 2000 蚊同我講，
呀仔攞去俾家嫂做家用，呢啲工咁辛苦，搞完罷工唔
好做啦）
淚就流出來

本人係新人，受外判商用不合法合約綁死既一份子，我地新入行學機，公司會逼我地簽兩份一式兩份既合約（全部合約公司keep晒，原因心知啦）
第一份係正式僱傭合約，講人工同放假啲野，都係寫分三更制（實際係得兩更）
第二份係講如果我地學機，要先比$5000 按金公司，之後每個月再比 $500/$1000，總之加埋比夠 $10000，如果1年內唔做/比人炒，你就咩都無，多過一年而未到兩年者就可以有一半收返，捱到兩年既就恭喜你啦，你可以等...等...等佢有心情就比返你
我地新入行傻下傻下比你呃左話返 8 個鐘，實際返 12 個鐘都算啦，你連我地自己既錢都要拖住先，我地唔出聲因為要生活，不過終有一日會有人爆，加 5% 人工好似皇恩浩蕩，實際都跟唔上通脹
如果我真係李老闆，我會逼啲外判商出黎交代清楚咁多年以來加人工既事囉，食左幾多就唔洗講啦，其實今年農曆新年後我間判頭已經宣佈左加 5%，公司同我講既時候，我真係諗，食餐飯都唔夠，你當我乞食咩~皇恩浩蕩呀~公司啲老闆呀經理呀，又換車又換樓，點解我地租屋都幾乎租唔掂，個個月都岩岩好，真係想買多件衫著都要諗清楚
至於亞嚴先生，人在做，天在看，你有學識，識交際，坐左個靚位，大小二便都有冷氣，解決完仲有香氛噴一噴個 WC，我地揸機，係上面都有冷氣，解決就放張報紙係地下好似狗咁，一邊排，一邊聽到控制塔問你：揸機你做咩停晒手，用個膠袋包住放埋一邊，依隻香氛出面無得買，嚴先生，我建議你黎過揸機體驗旅程，唔洗你辛苦，你上去跟機跟返朝 9 晚 5 全程坐係度向下望住啲玻璃 5 日就得啦，不過記得要試下係上面開一次大解，唔係你體驗唔到，最多我私人送份報紙過你，你體驗完再睇下自己良心諗法有無變啦
小弟唔想公開自己身份，請師兄們見諒，不過我有黎支持嫁

可能大家不知道碼頭裡面的各種機種是的牌照是如何考到！ 首先碼頭裡所有機種是由勞工處批出！其次勞工處放權比各發牌機構，進行發牌！而發牌機構本身就有各種機種設備同所謂的課程 ！課程本身由安全堂、筆試、由教官督導下親身操作、同路試！看上是非常正規同我們考車牌一樣！你們都知道考車牌的考官是政府人員把關的。但碼頭各機種的考官不是勞工處發出，而是碼頭自己的員工進行考核就得！咁大家有冇發現問題所在？為可考車牌的考官是政府人員，但碼頭各種重型機種的考官是碼頭公司自己的員工！點解香港有好多駕駛學校，但發牌是政府而唔係駕駛學校！點解碼頭是教育機構又是考核機構同時又係發牌機構於一身！可能勞工處信碼頭唔會搞出事還是什麼原因！但碼頭將發牌這種事情變成欺凌判頭員工的手段，碼頭他需要多少個操作員都不成問題，只要判頭員工要求加薪，便要判頭將員工炒魷魚，然後判頭將新員工報上就可以！因為考試率接近 90% 一次就可以成功，餘下的 10%完成第二次考試都能成功！從未有人要考第三次.

這樣的一樣龍發牌是健康嗎？或者有人會問平安咭機構都是自己課程自己考筆試自己發牌啦，有什麼問題！問題在於平安咭機構只是發牌比人去該場地的資格、而碼頭發牌是比資格人工同幫碼頭自己搵錢！這就是分別！

嗨！又到食飯時間嘞！吖、唔好意思！我唔記得我地揸機係無食飯時間嘅、嘻嘻！咁又唔係無飯食、你要食的話、咪好似我地咁囉！一路食、一路做囉,咪睇我盒飯咁細盒呀、我地個個揸機食個幾鍾都未必食得完呀！点解？咪食一兩啖、放低又做！食一啖、又再做！咁你話嘞！個飯盒係咪好低食呢！盒飯幾錢？30幾蚊啫、你無帶錢食飯？唔使怕！公司咁我地佢係有飯錢比番我地嘅！幾多？45 蚊囉！我盒飯就 30幾、公司就津貼我地 45、咁我地就要一路做、一路食嘞,你話嘞！呢個飯盒係咪好低呢 (判頭公司)？吖！重有呀、今日我又賺多咗筆外快呀！点賺？咪今朝有個伙記遲咗 20 分鍾之麻、佢就要比番 60 蚊我嘞！你話呢個伙記日日都遲到嘅話就好啦！点解？咁我咪可以比番45蚊呢支陰功 meal 公司囉.之後同佢講：我地要落地食飯呀！

呢個叫龍門架，我地叫龍
一個貨櫃 9 呎半，放六個高，自家吊住一個
望落去成 70 呎高，貨櫃場咁大
要去流動厠所最快 5 至10分鐘
如果有需要的話，已經瀨左，所以係上面解決
判頭工就冇食飯時間，所以判頭公司會派飯俾你
仲有，唔好成日話有加過人工
依家做 8 個鐘 日薪 470×26 日 一個月
12200 你可想未加之前有幾多
仲有唔同工種唔同價錢，唔好誤導外界

睇見這批外判工人咁齊心，我呢個“過來人“也不禁地佩服他們，能夠齊心地去爭取自己應該有的待遇！團結就是力量，我支持你們！
講開齊心，我唔知點解在 HIT做渣“龍“及“搭“的員工不襯呢個機會去爭取自己的待遇，我也是“過來人“呢間公司簡直當我地唔係人，人工仲加得小過班外判，另外勞工法例都要番6日便要放假啦，點解轉左制之後要番7曰先可以放一日假，尤其要番通宵 (23:00~08:00)，做足 7 晚先得一日假，其實個日跟本晤係叫做放假囉，大佬，我番完通宵嗰日都要瞓架，咁就當放假！食九我地。
仲有，我地都係人，係會病架，如果真係病到七彩都要死番工，點解？因為請病假要扣錢之外，仲要扣工作表現分到，取一日病假就等於年尾份花紅會小左三仟幾蚊，除非病到就死晤行得，你叫我吔點敢請假吖！大佬呀，機械操作要好小心架，有時病到PK都要番，其實好危險，但冇辦法，就係因為唔想小幾仟蚊，都要頂住！
遲到一分鐘要收警告信，要扣分，又無左幾仟！
最離譜就係工傷都要簽警告信，大佬，我因為工作而受傷，仲要簽信，又要扣分，咁咪即係年尾又唔見幾仟。
我晤明點解呢班公司員工晤襯呢個機會，好似d外判咁爭取番自己既待遇，個個都驚死，唔夠齊心同團結，要睇長遠 d 啦！
希望呢班員工真係諗下公司點樣對待你他，識得團結同齊心，快 d 襯有咁多業/外界支持去爭取番自己應有既待遇啦！晤好再坐喺度啦！
如果你吔仲唔出聲，就繼續被公司當你吔唔係人啦，到時晤好怨天怨地，要怨就怨d唔齊心，怕死同自私既同事！
無論點都好，如果你吔可以齊心，我呢個“過來人“一定第一個支持你吔！！！！！

related link:  " 碼頭的辛酸，封閉的國度 "