畸人誌異

新年開筆、開工、定開心好呢？
o岩o岩去發哥哥處睇佢抄「假牙」d 詩，玩創左個心——
就講笑話。

K 說：o個日返屋企，入到大堂，個管理員唔識o既？佢望下我，睇住我用鎖匙開信箱，咦，唔得o既？個鎖壞壞地o既，咁電梯到就趕過去跟眾人入，到喇，出電梯，楂住鎖匙開鐵閘，又開唔到o既？望下度門，咦，點解唔係我屋企架？樓層o岩喎，唔通行錯隔離o個座？落番大堂，個管理員一路睇住我行出去，我唔敢望佢……原來真係行錯呀。
眾聲笑中我o懶心水清咁問：你係米寫緊小說？佢通常好嚴謹，會請好大假，日日夜夜迷頭迷腦；佢同屋住又會照顧週到，煮定一日三餐，分大碗小碗裝好放冰箱等佢叮黎食……咁o既存活狀態就乜事都會發生啦。
K 答：冇，我放工。

華山論劍，小的雖非劍聖，無理由唔還番一招半式o既——
o個日從機場回家，坐上機場巴士諗下過左海都係轉的士，前一日在張家界拗柴，隻腳又腫又痛，費事孤身隻影拖住行李行上屋前又斜又長石級；再諗，咦，住緊個處叫乜野苑話？咁一路由機場到北角再到魚涌點都諗唔到，十幾年住過d 地址一一浮現，獨欠等下要話俾司機聽去邊，個腦有個區域好似停電blackout ……死死氣，由巴士站拖曳抵家。
最弊沿路冇乜人可以打救，搬家以來都未話俾人知住左去邊，阿哥跟車搬野黎過但唔會記得地址；這星球上只SC 知，新居由佢轉介，據云空置日久，佢係掌匙人，但佢應該未起身，又無謂打擾佢兼話佢知我o既早發性癡呆丫。

咁這等遭遇係唔會得人同情o既，正在諗，最危險處亦最安全，不如一五一十寫低d 記憶data o係呢處，下次再有乜事，就求其搵人幫我上blog 睇下，我是誰、住o係邊話？