狗經

我吃食，狗坐腳邊，等了又等，用盡佢d殺死人眼神，滿面甜言蜜語。
仲冇，開始不耐煩，哼哼唧唧，然後發惡，兩足人立，頂天立地完全冇平衡問題，企得咁上下前爪來抓大腿手臂，是置諸死地而後生。
好言相向：你唔食得架，食左會死架。
好似聽見狗用喉嚨說話：咁你俾我死。
這狗其實是英文台，佢主人用英文同佢溝通。至此一般只兩種結局，一是我投降，俾。二是我發惡，用佢簡易母語斥之：You bad bad dog, go, go away.
於是酒闌人散，狗打一個大大噴嚏，走開。
咁o既行為藝術，淺白易明，係spit on you.

狗在我家一向待遇不會差。是遺傳基因，今已傳至姪女兒，狗之屬主。
之冇得食，係據云佢有糖尿病、血脂高、過肥(咩標準呢？)又哮喘。
哮喘我見過。有時忽然企定，喉嚨嘰哩咕嚕作嘔嘔唔出，第一次以為佢同我玩，然後眼見佢透唔到氣之悽慘自己又無能為力，想起患哮喘病朋友用噴劑，狗有冇用呢？
姪女聽從獸醫建議，嚴控飲食。可她買回來d狗食真係狗都唔食。
好言相勸：換下第二種啦，餐餐好似要佢食毒葯咁。
得來白眼同埋怨：餓佢就會食啦，你成日俾第二d野佢食。
仗義每多屠狗輩？我餵狗咋喎。主人不在，狗糧加幾撮白飯，佢開開心心連d毒葯食哂。
向主人報告，又嬲：白飯有糖架，我俾埋醫院個電話你，佢遲早要入ER。
佢主人係教育碩士，目下教小一。咁我都算受過下教育喎，食白飯要入ER？
咁食菜得掛？這狗其實中意食crunchy類蔬菜同生果，尤其橙同桃，只要聞見，冇份食勢係假。關上房門食橙，以為可得一頓安樂吃，狗鼻係萬物之靈，千里追蹤，隔了房門狂抓。好喇，食哂，手都洗埋，佢進得門來非常不滿，周圍巡視，一隻狗鼻極忙，聞完房間聞洗手間，我好似作賊心虛，幾乎要問：阿sir，你有冇入房搜查令架？
狗又打一個噴嚏，揚長收隊。