寫下寫下離了題 , well, so what...

常常從生活出走，漸漸當然發現，又走得幾遠？
過慣了穿睡衣開工日子，寫意自在，與人對話，反應開始慢幾拍，甚且天馬行空，牛頭唔搭馬咀。
以日作夜，以夜作日，有人約食lunch談事情，若來者熟人，開門見山，問可不可以改為下午茶；來者笑，都好，費事你都未目訓醒，冇心機聽。
一桌人吃喝笑，總有人笑夠了就來指頭篤面：睇佢白成個樣。/人地駛幾多錢去美白都唔夠佢白。/鬼咩佢十世都唔曬下太陽。
已經久不穿著坦胸露臂衣服，不是怕左道德重整會，而是兩條慘白光管手臂，自己先觸目驚心。
物以類聚，與G說起受人揶揄，G說，我已經好耐去唔到銀行存收到d支票。
咁ATM呢。G說，我唔係好識用。
咁佢係藝術家，比我悲壯好多。
G還有話說：齣戲我好想睇，專登逼自己日頭去睇，你知唔知一開場就目訓著，訓到散場，係Art Center，散場時隔離個人個樣幾不屑我。
咁一人一票，訓覺冇罪喎。
於是一路笑，笑到腸臟開始隱隱作痛，然後漫延上心。
Anything that has something to deal with your heart, there is a problem.

如此星辰皆昨夜。
對上一回見G是在靈堂，她哭了又哭眼淚是崩缺的河，骨瘦如柴大熱夏天穿兩重長袖衣服。我們擁抱，我向她說你要保重，但覺懷中抱著一把顫動的骨頭，只一放手她就散落一地。
然後時日總必過去。我在白花花日光底下看見G的作品佔滿一整幅大廈外牆迎向大街，爾後斷斷續續不同媒介聽到她的聲音；不可以說就這樣放了心，卻也知道，總有人從廢墟彎身執拾滿地碎片，湊湊拼拼似番個人，再試下可以又走得幾遠。