聽下古仔，仲可以駁古添

（得閒去聽下古仔吧，自己講埋亦得，仲可以駁古添——）


每月一聚。「傳說我城」又入城，17 號黃昏7 點，地點照舊，灣仔藝術中心，二樓空地。

雄仔叔叔電郵提醒，照例先送一個故事——

「結石寶寶之家」發起人趙連海判刑翌日，下午五時，我剛踏出田灣一小學校園，收到商台＜左右大局＞梁小姐電話，想我就此事講一個兩分鐘的故事，第一反應是﹕嘩，神仙咩，話講就講，對這樣功能性的傳媒手段也向有猶疑。正想拒絕，卻轉念一想，那些結石孩子呢？那些父母呢？現在有兩分鐘，讓你向那個從不把人看作人的政權國體伸出你的手指.....好啦。身旁的朋友sandy提醒我，不是有個「吃夢」的故事嗎？吖，對。跳上970隧巴，一邊塞車一邊寫下梗概，到佐敦下車，在覺士道找一條無人的橫街，於昏暗的燈影下，對著電話講了個故事。回來把它稍作整理，如下﹕

有個細路，叫做阿望，希望個望。有一日，佢見到一架鹿車，喺屋企外面經過，係三隻鹿拉既鹿車，車上面有個老人。「咦，聖誕老人？」唔係，唔係，未到聖誕。鹿車有招牌，招牌上面好多字，但係大大幾隻﹕永遠正確，寫得清楚醒目。啊，阿望記得，連海叔叔講過，係正確老人。

正確老人唔係聖誕老人，唔係來派禮物，係來搜集Ｄ好矜貴既嘢，佢來搜集Ｄ夢。係呀，係夢。夢點解咁矜貴？因為夢就係幫我哋嘗試將一Ｄ唔可能既嘢變得可能。就係因為咁矝貴，正確老人未必搜集到，咁，佢就又偷又搶。

佢點解要咁多夢？因為佢要食囉。正確老人自己曾經係個夢，係一個幾正既夢，但係佢唔肯接受一個夢都會老去，死亡，一個夢都應該過去，俾Ｄ新既夢出來，於是佢就周圍攞Ｄ夢來食，維持自己既生命。

佢最仲意食細路仔Ｄ夢，愈細個細路愈好，夠新鮮，最補。另一個佢仲意細路Ｄ夢既原因，佢哋Ｄ夢好危險，佢哋Ｄ夢有免疫力，唔會因為老人話正確，就見唔到真實。譬如佢哋見到Ｄ冧咗既樓，支柱牆壁無鋼根水泥，佢地就話Ｄ支柱牆壁無鋼根水泥，佢哋唔會跟老人口水尾，話「如果地震好似佢咁正確，Ｄ樓就唔冧」。老人要食咗呢Ｄ夢，就係要保証自己「永遠正確」既生命。

為咗保証食到最新鮮既夢，就要記住食過邊Ｄ細路既夢，佢用石頭做標記，掛喺嗰Ｄ細路條腰，係呀，Ｄ細路好慘，一世孭住Ｄ石頭﹔有Ｄ細路甚至俾Ｄ石頭壓死咗。

連海叔叔將呢Ｄ事講俾好多人聽，因為佢個仔都俾正確老人搶咗Ｄ夢，佢希望大家一齊同正確老人討回公道，亦都希望其他人既仔女，唔會再俾正確老人害苦。正確老人當然唔俾佢得逞，捉佢去坐監。就喺佢坐監前，佢再一次同阿望講呢件事。

阿望，我想你將呢件事講俾其他人知，你係阿望，希望個望。

依家阿望見到Ｄ唔知呢件事既人，就同佢哋講﹕

請你哋記住呢件事
只要你哋繼續同其他人講
你就係阿望
你就係希望

雄仔叔叔

講古詳情 link: “our city our legends”