餘日流流

話說昨日天酷熱，趕在郵局關門前寄出轉眼已拖延半年郵件（咁你話何之謂趕呢？）反正人在街頭，揀日不如撞日，坐多幾個站地鐵去柴灣青年廣場探下d 熊仔 lor。
遠離青年組群好多年，唔識青年廣場係乜。又話說早幾日H 君電郵兩張照片，無附隻字，呀，有，電郵主題：更大型熊展。照片中熊主人／阿媽／奴隸站大張展示牌旁笑顏開、面容飽滿，心亦喜之，陪佢高興。於是手指的篤回問：邊度黎架？H 君晚後覆，依然不著一字，附另一張宣傳海報，不過佢用word file copy and paste，轉貼上網無效，心暗罵，玩咩呀。圖上起碼有展出時間地點，google 之，卻是歸入夏日青年活動項目，希望班古裝熊同青年組群玩高興d 啦。
到得青年廣場，隔遠觀之，玻璃幕牆，巍峨大樓，原來內中有青年旅舍，今日青年真多野玩。登六樓活動室，時維五點，站班熊仔們，背向落地玻璃引入之酷日餘光，滿身皮毛，嘆冷氣。別來無恙耶？有人（即係熊呢）好似換左新衫喎。透明展匣內躺著「受傷的月熊」，無以深究佢有幾傷，掏出二手新手機開光用下其之影相功能，及至後來，發現自己同部新機真係唔熟。
睇完班熊仔就坐兩站地鐵去東大街，食魚蛋粉不是主題項目，既肚餓亦無妨加入行程。奉勸無謂太迷信d 食家，民間吃食，何需太煞有介事。人相信太多乜乜指南，反為助長生活中種種積非成是。
離開東大街已近八點。六點至八點，用兩個鐘單係食魚蛋粉？誠然，非也。不過期間行事，屬 inclusively excluded，不入本文；自從成為東區住民就開發近區自由行點，費事招惹太多本來不知情人士搞亂市容。
登電車，叮下叮下過家門不落，一路叮去鰂魚涌，途中翻看所拍熊照，做咩呀？冇相睇，原來唔知點解開錯錄影功能，錄下連串天花地毯涼鞋腳趾意識流，非常行為紀事，d 熊仔哩，於鏡頭耽天望地間，大概亦莫知這無知婦女搞乜喎——


（偶有千言萬語，想誌之如是，等個 blog 多少少人氣，不過即無君祿可食，亦應學下擔來日之憂，d 死線一條又一條，宜乎做多 d 正經事。可惜實情係，自己 d 正經事，於好多正經人眼中，亦冇厘正經，咁至弊 lor......）