像我這樣的奶民

果然，我嫂電話就到。佢係三嫂，我三哥妻。
「點呀，仲有冇飲d 毒奶呀？」
「仲剩五盒，諗緊飲唔飲埋佢。我d 係純牛奶，唔係三鹿，又唔係奶粉，有幾毒。前晚睇電視o個個人講得幾有道理，佢話如果劑量唔重人體會自然排泄，況且都唔係今日至有，係終於爆發o者。」
「總之d大陸野信唔過啦…」well，呢位師奶日中讀萬卷書（d 八卦周刊）行萬里路（上深圳消費），冇哂d 大陸野睇下佢何以遣餘生。見我反應太平淡，掃興，「好彩我從來唔飲奶。」收線。

咁就順手打電話問候下我二嫂，二哥妻。佢賢惠。每逢春秋二祭、四時佳節，必叫我做節，大魚大肉不在話下，禽流感時依然食雞味香濃靚雞，孔雀石綠流行繼續食有魚。
中秋夜食飽之後一如既往打包所有剩菜，阿嫂搬出未斬熟雞半隻，「俾埋你。」照拎。「要唔要月餅？」已有一盒雙黃，夠。她某年給我一個六黃蓮蓉，吃得我，沒齒難忘。這夜她又開糧倉。「要唔要蒙牛？」如此就向佢稟告，近來改買伊利，細盒裝。「大盒開左飲唔哂好易變壞。」佢笑曰：「我地每朝一人一杯，好易飲完一盒。」佢地係我哥、我侄及我嫂一家三口。
現在電話響極冇人接聽。我哥係電視精，夜晚唔中意出街喎。
弊 lor，唔通我嫂成功毒殺親夫？