nothing unusual

去深水辦點事。老規矩，行過d 鋪仔攤檔摷下八下，應向東時走下走下愈往西行，十分八分鐘應該搞定的，就延伸閱讀到天已黑齊。
近年網上 d related links 其實好累事，培養一個人左link 右link 唔好習慣，時時為一個字詞愈岔愈遠，終而不記來時路什至本來目的。
下一站本來打算去銅鑼灣，眼前一排街巷正值風光無限，個心就話：過兩日至去啦。
如此這般竟然覺得平白多出一段happy hour。這時迎面若來個熟人，就點都拉佢去三杯兩盞淡酒(下句係乜呢？)，冇喎，卻見街邊食檔煎緊蘿蔔糕阿叔好熱情咁揚聲招呼路人甲：臭架，你試下啦，臭哩。
八卦心性又起，點會有人強調自己賣d 野臭架？走近加埋個鼻考察，有喎，阿叔身旁有鍋應係臭豆腐。回頭見我，又推銷：o岩唔o岩？我唔怕佢臭，不過唔食。這應屬外賣食檔，靠馬路邊竟霸得空間置三張摺檯、幾張凳，它不算大排檔，可這時忽然好想就在路邊坐下來。
發泡膠盒盛著四條熱腸粉，甜醬麻麻、芝麻太少，卻容我一人獨佔三張空檯以及整幅眼前風景，nothing unusual，一種市井人間尋常情味。其實都是一樣的。坐在巴黎路邊咖啡座，或者去逛倫敦Portobello Road 摷舊野，一樣都是遊蕩，一樣都是經歷。
就在這個城市，自己出生的地方，還有多少街巷從未去過？
那麼還要不要去看老遠的人和地？無妨。
也許不必太煞有介事就是了。