路漫漫而修遠兮

我哥好心，見我部lap-top日久失修，偷偷要替我換機。
佢買左部機交低俾個精伶攪機後生執下，由侄女於我生日送上。
係好野黎，無線上網，唔駛黐住條線做人。美中不足不是中文windows，諗住返香港再攪。
用得幾日，update下，就彈出大大warning話唔係正版wor，算好客氣，話我可能係翻版受害人。
上機前咿咿哦哦，一人又揹又抬兩部lap-top 過海關，咪話唔擔驚受怕，萬一要打開睇下，大大隻字this windows is not genuine，明明捉恐怖分子順手捉埋翻版，唔知條數點計。
至愛親朋聽見我咿哦，大都幾開心，等住睇我點死。奇怪哉，每次有瘀事，愈親我者愈覺得意，都算天妒紅顏。
至該日，LA 機場森嚴到令人覺得恐怕國將亡矣；送機者見滿街警察，快快在路邊放我落車絕塵而去，就好坎坷咁又拖又拉孤清上路。我中意o既LA 係所到之處大家總有d 幽默感，辦起事來你一言我一語癲癲dud 搞掂，目下從排隊check in 人人神色凝重客客氣氣，唉。
樽裝水絕對嚴禁，站在垃圾桶邊good good good 飲完半樽水；經過重重關卡，脫外衣除鞋，兩部電腦取出放上輸送帶照照照，照咩呢？d 仲高科技o既手提電話，冇人理wor。
人龍中我未算擾攘，係動作多d，乾脆就在輸送帶不遠著衫著鞋、慢條斯理將兩部電腦同d 手提行李重新組織，旁邊個持鎗男子任我勾留，換作往日大家會說將起來解下悶，今日佢對眼咁忙，唔得閒傾偈luu。
然後check point 個鐘又響，該名猶太肥佬(佢頭頂帽仔係標記)好無奈咁唔知應該行前定退後，當然馬上有人招呼佢：先生，你身上有d 乜？
好想多咀話，光天化日唔通有武器咩。
今日冇人打算講笑ga la，自己仲隨身攜帶not genuine 物，宜應速速離開是非地係真。