happy together

一人deal with兩犬，好忙。
上機前想做完的拖足成個夏天的事，肯定泡湯。
二犬成哭？兩位唔知幾開心。小的為奴為婢，走出走入，又要照顧雙方感受，唔可以偏心。
來寄宿的Bobo，一歲卦，牛高馬大，好鬼嗲，算係金毛尋回定乜呢，成日唔記得問清楚。
地主Louie，四歲，身型同Bobo比係小巫；我叫佢路意，國語發音，日中多叫短名Luu。佢好似係西施。
Sorry, to me, a dog is a dog, 不理黑狗白狗，更不以種類分。
一向唔中意狗d名太"人"。
我的狗叫dumbbie、黑鼻、紅鼻、白雪，少時還有名烏頭，媽媽取的名字。
Bobo爛玩，路意貪食。以我妹說法，一隻係野外犬而另一隻係家犬。Bobo唔可以入屋，佢d破壞力係所到之處屍橫遍地，成日逗人玩波，忘形企起撲過來雙掌拍我心口，似俾匹馬踩過，痛入心脾。
我妹d狗名冇乜創意，Bobo上任叫Bon Bon，享年十二，我妹喪犬時停工三日，事由係death in family。
Bobo眼神單純明淨，一如江主席所言simple and naive。路意是你永遠唔知佢見到d乜又諗緊乜。一對波子眼混雜千種神色。
好怕同狗對望，四目交投通常都輸。
輸心軟。