地上明月光

今晚無暇望天上月亮。
我侄孫，係一屋人之地上明月光，焦點所在，誰與爭鋒。噢，yeah，佢大名就叫鋒鋒，名字乃高人指點，由佢阿爺吾兄敲定。
唉，穴中日月彈指過，害怕又有乜用，本人乃，姑婆喎，係姑婆呀。這晚我等上古人揶揄當今世代 d 啤啤幾個月人仔就上什麼 play group，我侄媳曰：姑姐你連d 花花草草死都種返生，一定好有愛心，送佢去 play group 前先俾你教下佢嘞。鋒鋒食完 5 安士奶，鋒爸正無比慈愛摟住愛兒掃風。遂與這對八十後慈父慈母說，得，俾佢同我住一個月，包佢食完奶識得自己洗乾淨個奶樽。我侄畢竟認識姑姐日子非淺，眼露敬畏之色，向懷中愛兒呢喃說，國民教育呀。
睇怕小朋友來日聽見姑婆兩字，會淚流滿面。

（鋒鋒玉照，當然來自吾侄 facebook，佢姑婆點識搞咁多心心特技喎——）