my ferry tale

3月31日，忽然起興。遊港九。

5：20pm 西九龍的天空，豆腐花雲。

6：32—6：58pm 紅磡碼頭，據說久已不曾出現這許多人。是來晚了，早幾個鐘來，應該還可以避開熱情群眾和相關各界。站入口處遊魂，得職員有禮接待：「係唔係坐船？係就快 d 入喇。」身後有人問，「我坐左過去，趕唔趕得切坐返過黎？」是不可以想像的，竟然掏出八達通拍咭入閘，還要面對選擇題——左邊往中環，右邊去灣仔。

7：05—7：40pm 渡輪開離碼頭天已經全黑了，兩岸燈璀璨，如舊。一船人山人海，幾乎人手一機，影呀影。然則傻瓜機影夜景是無意義的，又唔係攜重型武器霸晒位趴船邊 d 龍友。這一段影像，從缺。旁邊女子拿了手機加入爭分奪秒，男子則與她說，係條航線停航，d 夜景唔會消失喎。我心激賞，高見。他倆還有一部嬰兒車，人聲擾攘中，個啤啤面仔圓圓，舒舒服服，大覺瞓。
船泊碼頭落跳板，本人屬離跳板最近急急腳上岸前十名，抬頭，但見眼前一排三腳架，各位傳媒恭候登岸。呢班未係最後一班船喎，若見有人魚目混珠亂發報，本人一定挺身揭發。
其後沿中環碼頭邊上略徘徊。才終而醒覺，它現在不叫天星碼頭了。有人用大聲公講話，提醒大家等下要克制——我地一陣上船，記住，今日係黎送殯……
向右邊走，回程，坐中環往尖沙咀；好似才是不久之前，有人試圖用盡各種方法，阻擋它的拆遷。它不叫做天星碼頭之後，真是漸行漸遠，好日唔黎。這一程，乘客就三四十，粗略算，大概有二十多名日本嬸嬸；相逢也是緣份，我們就同坐一條船，夜遊香江——